| 1 | Apud Antissiodorum natalis sancti Germani episcopi. Qui ob refutandam Pelagianae haeresis perfidiam, omnium Gallicanorum pontificum iudicio, Britannias mittitur. In medio igitur pelagi, cum iter beatus pontifex ageret, inimica vis concitata tempestate magnum navigantibus periculum exhibuit. At ille consurgens, invocato nomine Domini, procellarum immanitatem sedavit. Deinde Britanniam perveniens, haeresim exortam compescuit; tribuni cuiusdam filiam, decem annis caecam, illuminavit; in vicina qua manebat casula furens incendium exstinxit: infirmitatis suae dolorem (erat quippe laeso pede debilis) coelesti se visitante persona exsuperavit. Saxones et Picti contra Britones eo tempore bellum intulerunt, sed Germano ducis officium assumente, precibusque non armis dimicante, hostes in fugam vertuntur. Post multa virtutum insignia, Ravennam pro pace Armoricanae gentis supplicaturus advenit, ibique a Valentiniano honorifice susceptus, post aliquot dies finem vitae praesenti imposuit, corpusque ipsius ad suam urbem relatum est. |