| 1 | Sanctorum martyrum Cypriani episcopi, et Iustinae virginis. Scholasticus quidam, Agladius nomine, apud Antiochiam videns beatam Iustinam, exarsit in concupiscentia eius, et promisit Cypriano mago duo talenta auri si virginem Iustinam in illius amorem excitaret. Cyprianus magus, convocatis daemoniis, coepit agere ut per eos sancta Dei seduceretur; cumque id daemones nullatenus efficere valerent, ac signo Crucifixi se ab ea repelli faterentur, Cyprianus, diaboli virtutem contemnens, ab episcopo Anthymo catholicis se mysteriis imbui rogavit. Nec multo post diaconus ordinatur, ac deinde virtutibus et miraculis excrescens, etiam episcopatus dignitate sublimatur. Procedente tempore Cyprianus episcopus et virgo Christi Iustina comprehensi, vinculis alligantur: episcopus suspensus exungulatur, sancta Dei post alapas crudis nervis immaniter caeditur, dein cum pice, adipe et cera in sartagine torrentur, postremo etiam gladio iugulantur. Sed et Theognotus quidam simul cum illis punitur sub Diocletiano imperatore, iudice Eutelamio [Eutholmio]. |