| 1 | In civitate Chalcedone natalis sanctae Euphemiae. Haec sub Diocletiano imperatore cum aliis quadraginta novem tradita est proconsuli Prisco, et post carceres ac tormenta rotarum, post verbera et ignes, lapidumque angularium pondera, post secures et sartagines igneas, in theatrum ducitur, ac leonibus et bestiis obiicitur. Tunc beata virgine orante una bestiarum accessit, morsumque sancto eius corpori infixit, et ita sancta Dei animam emisit. |
| 2 | Eodem die Romae sanctae Luciae et Geminiani. Quae beata videlicet Lucia cum triginta et sex annis in laudabili virginitate Deo serviret, accusata est a filio suo Euprepio, et coacta ut idolis sacrificaret, imperatore Diocletiano, iudicibus Apofrasio et Megasio. Quod facere contemnens, post carcerem et saevissima verbera missa est in ollam pice et plumbo ferventem; de qua illaesa egrediens, onerata ferro et plumbo per plateas trahitur civitatis, et cum pertransisset domum cuiusdam potentis nomine Geminiani. idem vir coelesti miraculo instinctus (visa est quippe super caput eius columba residere), pervenit ad locum ubi sancta Dei torquebatur, et petens baptismum, cum illa pariter gladio trucidatus est. |