Notkerus Balbulus, Martyrologium, 9, IV ID. SEPTEMB.
| 1 | Apud Africam natalis sanctorum episcoporum Nemesiani, Felicis, Lucii. |
| 2 | Item Felicis, Littaei, Polyani, Victoris, Iaderis et Dativi. Qui sub Decio [Gallieno] et Valeriano pro fide Christi graviter fustibus caesi, compedibus vincti, et ad fodienda metalla deputati, martyrium consummaverunt. |
| 3 | Eodem die in Calchidona [Chalcedone] SS. Sosthenis et Victoris, qui cum beata Euphemia pro Christi nomine decertaret, trusi sunt in carcerem. Inde producti ad stipitem religantur: deinde ursi et ferocissimus leo in eos dimittitur; sed cum nullatenus a bestiis laederentur, Priscus proconsul illos concremari decernit: interea orationi incumbentes dato sibi pacis osculo, spiritum emiserunt. |