| 1 | Romae, via Ostiensi, Felicis et Adaucti martyrum. Hic Felix cum ad diversorum deorum imagines duceretur compellendus sacrificare, Serapis, Mercurii et Dianae exsufflans statuas deiecit. Pro qua re suspensus est in equuleum, et de patibulo vivens depositus, iussus est decollari. Cumque eo duceretur, obvius est ei quidam Christianus, qui divino instinctu subito exclamavit: 'Et ego ipsum quem hic sanctus presbyter confitetur, Dominum Iesum Christum colo.' Mox et ipse comprehensus cum beato Felice decollatus est. Hunc postea Christiani, quia nomen eius ignorabatur, Adauctum appellaverunt, quia martyri Felici auctus sit ad coronam; ipsique pro fidei confessione corona martyrii sit aucta. |