Notkerus Balbulus, Martyrologium, 8, V KAL. SEPTEMB.
| 1 | Beatissimi Hermetis martyris. Qui cum esset praefectus, ab Alexandro pontifice et martyre baptizatur, filiique eius et familia cum illo; deinde ab Aureliano imperatore trusus in carcerem, tribunum Quirinum cum omni domo sua ad fidem convertit. Quod audiens Aurelianus, beatum Hermen [Hermetem] decollari praecepit. |
| 2 | Eodem die, in Africa, depositio sancti Augustini episcopi, mirabilis in omni scientia viri. Qui de haeresi Manichaeorum ad Christi gratiam Ambrosii episcopi doctrina conversus, Hipponensi Ecclesiae dignissimus praeficitur antistes. Huius venerabile corpus, prius de sua civitate propter barbaros Sardiniam translatum, nuper a Luitprando rege Longobardorum Ticinis relatum atque honorifice conditum est. |
| 3 | Eodem die Emmoniae, quae est civitas provinciae Carniae, passio sancti Pelagii martyris. Qui tempore Numeriani imperatoris, agente Velasio [Evilasio] iudice, pro fide Christi primo ferri pondere collo manibusque gravatus, in carcerem truditur: eductus virgis verberatur, dein fustibus caeditur, postea equuleo suspensus, ungulis laceratur, oleo bulliente ventrem infunditur, super fragmenta testarum, ligatis manibus ac pedibus, protrahitur, postremo capite truncatur. |
| 4 | Eodem die, Brillatensi oppido, nativitas sancti Iuliani, qui a persecutoribus ob Christi confessionem, desecto gutture, necatus est. |
| 5 | Constantinopoli sancti Alexandri episcopi et confessoris, cuius virtute orationis Arius crepuit medius, et diffusa sunt omnia eius viscera in terram. |
| 6 | Eodem die apud Santonas sancti Vibiani [Viviani] episcopi. |