| 1 | Caesareae passio sancti Fabii martyris. Qui cum ferre vexilla praesidialia recusaret, primum diebus aliquot in carcerem trusus est, deinde productus sistitur ante tribunal, interrogatus semel et iterum, in Christi confessione perdurat: et mox a furibundo iudice capitali sententia damnatus est: cuius etiam detruncato cadaveri sepultura per triduum sub custodia negabatur. Quod postea, reticulo inclusum, in maris profunda seorsum et seorsum caput immergitur. Sed Domini virtute rescisso reticulo, membra capiti revocantur, et scapulis cervix cum indiciis passionis adiungitur; atque ita suae integritati redditum corpus unda blandiore ad Cartenitanum littus evectum, et condigno cultu a fidelibus in basilica tumulatum est. |