Notkerus Balbulus, Martyrologium, 7, VII KAL. AUG.
| 1 | Nativitas beati Erasti, qui Philippis a beato Paulo episcopus relictus, ibi martyrio coronatus, quievit. |
| 2 | In portu Romano Hyacinthi, sub consulari Leontio, Luxurio primo civitatis Terracinae tradente. Qui missus in ignem, nullo modo laedi potuit: inde praecipitatus in validissimum torrentem, incolumis eiectus est ad ripam. Quibus Leontio nuntiatis misit spiculatorem cum militibus ut eum gladio ferirent. Tunc quaedam matrona, nomine Iulia, corpus eius collegit et in praedio suo cum honore sepelivit. |
| 3 | In Laodicia Phrygiae Ioviani, Iuliani, Aemilii, Felicis, Martiani, Maximae, Saturnini, Gloriosae. |