Notkerus Balbulus, Martyrologium, 7, XV KAL. AUG.
| 1 | Romae via Tiburtina, milliario octavo, nativitas sanctorum Symphorosae martyris, matrisque septem germanorum, quae cum ipsis est posita; nomina vero germanorum haec sunt: Petri, Marcelliani, Ianuarii, Dionysii, Sympronii, Clementis, Hirenei . |
| 2 | Apud Carthaginem natalis sanctae Gudenes [Gundenis] quae Plutio [Planciano] et Reto [Geta] consulibus, iussu Rufini proconsulis, quatuor diversis temporibus equulei extensione vexata, et ungularum horrenda laceratione cruciata, carceris etiam squalore diutissime afflicta, novissime gladio caesa est. |
| 3 | Apud civitatem Metensem depositio sancti Arnolfi episcopi, qui sanctitate et miraculorum gratia illustris, eremiticam vitam etiam in episcopatu diligens, beato fine quievit. |