Notkerus Balbulus, Martyrologium, 7, VII ID. IUL.
| 1 | Romae ad Guttam iugiter manantem nativitas sancti Zenonis et aliorum decem millium ducentorum et trium. |
| 2 | Item Floriani et Fausti. |
| 3 | In civitate Tyro [Thora], non longe ab urbe Roma, Anatoliae et Audacis sub Decio imperatore. Quorum Anatolia, cum multos in Piceno infirmos, lunaticos ac daemoniacos curasset, ducta est, iubente Faustiniano, ad civitatem Tyri [Thorae], et diversis plagarum generibus vexata, deinde cum serpente tota nocte inclusa, nihil laesa est. Quin et ipsum Marsum, qui serpentem dimiserat, nomine Audacem, mane a suo serpente devorandum eripuit, et ad Christi martyrium convertit. Nam et ipse post hoc ob confessionem veritatis in custodiam datus, nec mora, capitali sententia coronatus est. Ipsa quoque Christi virgo gladio transverberata cum staret extensis manibus in oratione, ita ut per dextrum latus gladius missus, per sinistrum exiret. Passa est septimo Iduum Iulii, sepulta autem est mane a civibus Tyrensibus [Thorensibus]. |
| 4 | Mediolani nativitas sancti Mochimi [f. sancti Monae]. |
| 5 | In Aegypto Cyrilli episcopi. Qui a Lycio duce flammis iniectus, illaesus evasit; ac stupore tanti miraculi a iudice dimissus, cum rursus verbum Dei alacriter praedicaret, ac plurimos efficacius ad fidem Christi converteret, iudex, impietate repletus, eum capite plecti iussit atque optatum martyrii finem consummavit. |
| 6 | Item in Aegypto sancti Serapionis episcopi et confessoris. |
| 7 | In civitate Martulana sancti Brici [Brictii] episcopi et confessoris. Qui sub iudice Martiano postquam os lapide contusum est, et in equuleo crudelissime cruciatus, in confessione Domini perdurans, in carcerem trusus est; nocte autem terraemotu gravi civitas est percussa, inter alios plures etiam Martianum occidit. Et Christi confessor ab angelo sancto et a beato Petro apostolo visitatus, atque ad praedicandum Evangelium confortatus, magnas populorum credentium multitudines omnipotenti Deo lucrifaciens, quievit in pace. Cuius animam viderunt astantes in specie columbae niveae coelo recipi. |