Notkerus Balbulus, Martyrologium, 5, V KAL. IUN.
| 1 | In Sardinia passio sanctorum Aemilii, Felicis, Priami, Luciani. |
| 2 | Romae nativitas sancti Ioannis papae. Quem, quia orthodoxus erat, et a Iustino, imperatore orthodoxo, Constantinopolim veniens gloriose susceptus fuerat, Theodericus rex Arianus revertentem Ravennae in custodia detentum ad mortem usque cum aliis aeque catholicis viris perduxit. Huius meminit sanctus Gregorius in libro Dialogorum. Cuius corpus, translatum de Ravenna, sepultum est in basilica sancti Petri apostoli, quinto Kalendarum Iunii, Olibrio consule. Quo tempore Theodericus rex duos senatores praeclaros et exconsules, Symmachum et Boetium, occidit. Qui nonagesimo octavo die postquam Ioannes papa defunctus est, subito interiit, et in ollam Vulcani proiectus, ultra non comparuit. |
| 3 | Item apud urbem Parisium depositio Germani episcopi et confessoris. Qui ex nobilibus quidem parentibus exortus, sed malitiosorum omnimodis attentatus insidiis, divina se gratia protegente, non solum vivus et incolumis evasit, sed et in virile robur virtutibus et sapientia decoratus excrevit in tantum, ut a sancto Nectario presbyter ordinatus, abbas monasterio sancti Symphoriani praeficeretur invitus; in cuius regimine ita et divino iudicio et humano placuit arbitrio, ut claves portae Parisiacae, et prius in visione per Dominum, et postmodum in episcopatus electione per cohibentiam acciperet populorum. Cuius dignitatem tanta auctoritate administravit, ut tamen exemplo beati Martini propositum monachi virtutemque non desereret, atque ideo et in carne vivens, et spiritu coelos petens, in miraculorum ostensione illi per omnia similis appareret, et eadem aetate, octogenaria videlicet, ad Christum, ipso vocante, plenus sanctitate migraret. |