| 4 | In Moesia, civitate Doroftorensi, nativitas sancti Iulii. Qui tempore persecutionis cum esset veteranus et emeritae militiae, comprehensus ab officialibus, et Maximo praesidi oblatus, nolens sacrificare idolis, et nomen Domini Iesu Christi constantissime confessus, capitali sententia punitus est. Cumque duceretur ad locum caedis implendae, Hesychius quidam miles cum et ipse ob fidem Christi comprehensus detineretur, rogabat eum dicens: 'Memor esto mei, nam et ego subsequor te. Plurimum etiam saluta Pasicratem et Valentionem famulos Dei, qui nos per confessionem bonam iam praecesserunt ad Dominum.' Iulius vero osculans Hesychium dixit: 'Frater, festina venire: mandata tua iam audierunt quos salutasti.' Sic accepto orario, ligans sibi oculos, martyrii palmam gladio caedente percepit. |