Notkerus Balbulus, Martyrologium, 5, VII KAL. IUN.
| 1 | Nativitas sancti Quadrati, Apostolorum discipuli, qui in locum beati Publii Athenarum episcopus constitutus, Ecclesiam grandi terrore dispersam fide et industria sua congregavit. Cumque Adrianus Athenis exegisset hiemem, invisens Eleusinam, et omnibus pene Graeciae sacris initiatis dedisset occasionem, eis videlicet qui Christianos oderant, absque praecepto imperatoris vexare credentes, porrexit ei librum pro nostra religione compositum, valde utilem plenumque rationis et fidei, apostolica doctrina dignum: in quo et antiquitatem suae aetatis ostendens, ait plurimos a se vivos qui, sub Domino variis in Iudaea oppressi calamitatibus, sanati fuerant. Qui una cum filiabus Philippi in prophetica gratia celeberrimus fuit. |
| 2 | Item in Africa, sancti Quadrati martyris in cuius solemnitate sermones sancti Augustini inveniuntur habiti. |
| 3 | Romae, Symmitrii presbyteri et aliorum viginti duorum, quos Antoninus imperator gladio pro Christo puniri fecit: quorum corpora noctu beata Praxedis collegit et in coemeterio Priscillae sepelivit. |
| 4 | Tuderto, Tusciae, Felicissimi, Heraclii, Paulini. |
| 5 | In territorio Antissiodorensi passio sancti Prisci martyris cum ingenti multitudine. |
| 6 | In Britannia depositio sancti Augustini episcopi et confessoris. Qui missus a beato Gregorio papa, primus genti Anglorum Christi Evangelium praedicavit, atque illic virtutibus et miraculis gloriosus in pace quievit. |