| 1 | In Tuscia, civitate Pisana, nativitas sancti Torpetis martyris sub Nerone principe. Qui magnus quidem prius in officio Neronis Caesaris fuit, sed a beato Antonino presbytero baptizatus, et in fide Christi eruditus est. Quem cum Nero cognovisset esse Christianum, tradidit cuiquam propinquo suo Satellico, ut eum sacrificare compelleret. Sed cum Spiritu Dei confortatus beatus vir, et in fide fundatus immobilis permaneret, fecit eum Satellicus alapis caedi, et ligatum ad columnam tandiu verberibus affici, quousque sanguis guttatim de corpore ipsius efflueret. Sed subito dum martyr caederetur, columna cadens oppressit iudicem, et cum eo viros quinquaginta. Inde tentus a ministris, positus est in rota. Inde feris obiectus a filio Satellici, sed minime laesus ab eis. Cuius constantiam et virtutem quidam consiliarius Neronis, Evellius nomine inspiciens, Christo credidit, ac post paululum baptizatus, decollatus est in urbe Roma martyriique honore coronatus. Sed et beatus Torpes, iubente Sylvio, foras civitatem Pisanam ductus, decollatione martyrium suum complevit tertio Kalendas Maii. Cuius festivitas et conventus civium decimo sexto Kalendas Iunii agitur. De quo etiam fertur quod ingens machina, quam adversarius Dei Nero ad similitudinem coeli commentando fabricavit, meritis et orationibus eius in flumen Auxarum praecipitata fuerit, ita ut nusquam comparuerit. |