| 1 | In civitate Sanctonis nativitas S. Eutropii martyris. Qui a beato Clemente, apostolorum successore, ad episcopatum consecratus et in Gallias praedicandi gratia directus, impleto huius officii munere, insurgentibus paganis, quos auctor invidiae credere non permisit, ictu securis colliso capite victor occubuit. |
| 4 | Passio sanctorum Mariani et Iacobi, quorum prior lector, sequens diaconus erat. Et cum iam pridem infestationes Decianae persecutionis in confessione Christi evicisset, iterum cum charissimo collega tentus, apud Cirtensem coloniam, post dira et exquisita supplicia, ita ut Marianus per summos apices pollicum suspensus, et gravi pondere pedibus innexus, crudelissime torqueretur, tum caeteri in carcere macerati sunt, sed divinis revelationibus mirabiliter confortati; deinde Lambelisitanam urbem ad praesidem directi, et rursum longo tempore carcerali ergastulo mancipati, sed iterum divinis revelationibus allevati, novissime cum multis aliis gladio consummati sunt. |