Notkerus Balbulus, Martyrologium, 4, XII KAL. MAII.
| 1 | Romae, S. Victoris episcopi, qui tertius decimus post beatum Petrum rexit Ecclesiam annos decem, et sub Severo principe martyrio coronatus est. Hic constituit ut sanctum Pascha die Dominico celebraretur, et a quinta decima luna primi mensis usque in vicesimam primam observaretur. Quod eatenus sexta die Kal. Aprilis absque ullius diei discretione vel lunae observatione celebratum est. Et constituit ut, necessitate cogente, sive in flumine sive in mari, sive in fontibus sub Christiana confessione, quicunque homines ex gentilibus venientes baptizarentur. |
| 2 | Item Romae, sanctorum martyrum Sulpitii et Serviliani. Qui praedicatione et miraculis beatae Flaviae Domitillae ad fidem Christi conversi, quae etiam sponsas eorum Theodoram et Euphrosynam ad spem vitae aeternae et perseverantiam sanctae virginitatis lucrata fuerat, persecutione Traiani, cum nollent idolis immolare, a praefecto Urbis Aniano capite caesi sunt. Quorum corpora Christiani rapientes, posuerunt in praedio eorum, via Latina, milliario secundo. |
| 3 | Eodem die in Galliis, civitate Ebrequnensi, nativitas sancti Marcelli, primi eiusdem urbis episcopi et confessoris. Qui divino iussu cum sanctis sociis Vincentio et Domnio ex Africa veniens, maximam partem Alpium Maritimarum, verbo et signis admirandis, quibus usque hodie refulget, ad fidem Christi convertit. Ita ut baptisterium quod ipse apud praefatam urbem condidit, in sacrosanctis Paschalis festi vigiliis, divina virtute singulis annis aquis subitis inundaretur, et per septem eiusdem solemnitatis dies gratia exuberante permaneat. Venerabiles socii eius, apud Dimensium urbem conditi, gloriosis nihilominus miraculis commendantur. |