| 1 | In Aegypto nativitas sanctorum Victoris, Victorini, Nichophori [Nicephori], Claudiani, Dioscori, Serapionis et Papiae, sub Numeriano imperatore, agente Sabino duce. Quorum primus in pilam ex robore cavam, et undique circumforatam missus, ac per singula foramina diutissime transpunctus, cumque nimius sanguis efflueret, eductus de pila, capite caesus est. Secundus, manibus et pedibus amputatis, in eamdem pilam missus, prioris tormenta sustinuit et novissime gladio caesus est. Tertius cum ultro in pilam fuisset ingressus, indignatus iudex iussit eum inde produci, et supra craticulam prunis substratam aliquantum perassari et inverti. Cumque in confessione persisteret, sublatus inde, minutatim gladio concisus, spiritum reddidit. Reliquorum quatuor Claudianus et Dioscorus flammis incensi, Serapion et Papias gladio perempti sunt. |