Notkerus Balbulus, Martyrologium, 2, IV NON. FEBR.
| 1 | Hypapante Domini, vel purificatio beatae Mariae, quando Dominum Iesum cum hostiis secundum legem praesentavit in templo, et ipsum esse Christum Simeon et Anna in Spiritu sancto cognoverunt, et exspectantibus redemptionem Hierusalem praedicaverunt [Luc I]. |
| 2 | Apud Caesaream nativitas beatissimi Cornelii centurionis: cui cum preces et eleemosynae suae Deo acceptae ab angelo nuntiarentur, mox ex admonitione eiusdem angeli, ad sanctum Petrum apostolum legatos direxit, ut ad salvationem subvenire dignaretur. Qui visione coelitus delata edoctus, ne immunditiam gentilium abhorreret, ad eum properans, et de fide Iesu Christi in auribus gentium disputans, ac Spiritum sanctum ex dono linguarum eos accepisse non dubitans, eos iussit baptizari, post conversionem multorum millium ex Iudaeis, has primas ex gentilibus primitias Deo consecrans. Qui Cornelius, relicta militia, apud praefatam urbem episcopi honore sublimatus quievit. |
| 3 | Romae, sancti Aproniani commentariensis, qui a Sisinnio diacono Marcelli papae baptizatus, a Laodicio praefecto Urbis capite truncatus est, temporibus Maximiani Augusti. |
| 4 | Item Romae foro Sympronii, via Flaminia, milliario ab Urbe CLXIII, Laurentii, Hippolyti, et nativitas S. Fortunati. |
| 5 | In Africa, Victoris, Maurini, Honorati, Urbani, Hilarii, Perpetui, Iuliani, Privatulae et aliorum septuaginta quatuor. |
| 6 | Aurelianis depositio B. Flosculi episcopi et confessoris, et Sichariae virginis. |