| 1 | Romae nativitas Papiae et Mauri militum tempore Diocletiani: qui constantiam videntes Saturnini et Sisinnii martyrum, conversi sunt ad fidem. Statimque iussum est a Laodicio praefecto Urbis, ut os eorum, quo Christum confitebantur, lapidibus contunderetur, et retunderentur [retruderentur] in carcerem, ubi erant baptizati ab Marcello papa. Quos post dies duodecim eductos, iussit sterni in viam et fustibus caedi; deinde levatos de terra plumbatis caedi donec exspirarent. Quorum corpora colligens noctu Ioannes presbyter, sepelivit via Nomentana, ad nymphas beati Petri, ubi baptizabat. Scriptum in gestis beati papae Marcelli. |