| 1 | Romae Fabiani papae, qui cum viginti quinque annis Ecclesiae praeesset, passus est tempore Decii et in coemeterio Callixti sepultus. Hic regiones divisit diaconibus, et fecit ut septem diacones totidem notariis imminerent, ut gesta martyrum in integrum colligerent, et multas fabricas per coemeteria fieri praecepit. In cuius electione fertur Spiritus sanctus in columbae specie plurimis apparuisse. Item Romae, eodem die, nativitas S. Sebastiani martyris, qui in tantum charus erat imperatoribus Diocletiano et Maximiano, ut principatum ei primae cohortis traderent. Quem Diocletianus, ubi Christianum cognovit, nec a fide posse revocari, iussit ligari in medio campo, quasi signum ad sagittam, et sagittari a militibus. Qui cum, sagittis plenus, quasi hericius staret, putantes eum mortuum, abierunt. Nocte autem veniens quaedam mulier, nomine Hirene, tollere corpus, invenit eum viventem, et adduxit eum in domum suam, et curam eius egit. Qui ubi convaluit, multos in fide confortavit. Nec mora ipsis imperatoribus apparens, eos prout digni erant corripuit. Tunc, iussit cum Diocletianus in hippodromum palatii duci, et fustigari usque deficeret: quem mortuum in cloacam maximam miserunt. Sed ille apparuit in somniis sanctae matronae Lucinae dicens: Iuxta circum invenies corpus meum, pendens in unco, et dum levaveris, perduces ad Catacumbas, et sepelias me in crypta iuxta vestigia apostolorum. Quae ipsa nocte cum servis veniens totum ita complevit. |
| 2 | Eodem die Romae SS. martyrum Marini [Marii] et Marthae cum filiis suis Audifax et Ambacuc [Abachum] nobilium de Perside qui ad orationem venerant Romam tempore Claudii principis. E quibus post toleratos fustes, equuleum, ignes, ungues, manuum praecisionem, Martha in nympha necata, caeteri decollati. |