Notkerus Balbulus, Martyrologium, 1, IV NON. IAN.
| 1 | Octava sancti Stephani. Romae Telesphori papae. Qui constituit ut septem hebdomadibus ante Pascha ieiunium celebraretur, et in Nativitatis Domini nocte missa frequentaretur, et hymnus angelicus, id est Gloria in excelsis Deo, caneretur. Omni autem reliquo tempore, nullus ante horam tertiam, qua Dominus traditur crucifixus, missam celebrare praesumeret. Hic etiam martyrio coronatus, sepultus est iuxta corpus S. Petri in Vaticano. |
| 2 | In Antiochia Macharii abbatis. Et in Ponto civitate Tomis, trium fratrum, Argei, Narcissi et Marcellini pueri. Item Tomis Phili episcopi. Qui sub Licinio Caesare inter tirones comprehensus, cum nollet militare, caesus ad mortem, et diu in carcere maceratus, et in cippo missus, deinde in mare demersus, martyrium consummavit. Cuius corpus ad littus delatum, et a religiosis viris depositum, magnis coruscat virtutibus. |
| 3 | Viennae depositio B. Florentii episcopi. |
| 4 | In territorio Lugdunensi, monasterio Iurensium, S. Eugendi abbatis, cuius vita virtutibus et miraculis plena refulsit. |