Notkerus Balbulus, Gesta Caroli Magni, LIBER II., PREFATIO.
| 1 | In praefatione huius opusculis tres tantum auctores me secuturum spopondi. |
| 2 | Sed quia praecipuus eorum Werinbertus VII. die de hac vita recessit et debemus hodie, id est III. die Kal. Iunii, commemorationem illius orbi filii discipulique agere, hic fiat terminus libelli istius, qui ex sacerdotis eiusdem ore de religiositate et aecclesiastica domni Karoli cura processit. |
| 3 | Sequens vero de bellicis rebus acerrimi Karoli ex narratione Adalberti, patris eiusdem Werinberti, cudatur. |
| 4 | Qui cum domino suo Keroldo et Hunisco et Saxonico vel Sclavico bello interfuit et, cum iam valde senior parvulum me nutriret, renitentem et sepius effugientem vi tandem coactum de his instruere solebat. |
| 5 | EXPLICIT PREFATIO. |