Notkerus Balbulus, Gesta Caroli Magni, LIBER PRIMUS GESTORUM KAROLI, 13.
| 1 | Providentissimus Karolus nulli comitum nisi his, qui in confinio vel termino barbarorum constituti erant, plus quam unum comitatum aliquando concessit, nulli episcoporum abbatiam vel aecclesias ad ius regium pertinentes nisi ex certissimis causis unquam permisit. |
| 2 | Cumque a consiliariis sive familiaribus suis interrogaretur, cur ita faceret, respondit: 'Cum illo fisco vel curte, illa abbatiola vel aecclesia tam bonum vel meliorem vassalum, quam ille comes est aut episcopus, fidelem mihi facio'. |
| 3 | Ex certis autem causis quibusdam plurima tribuit, utputa Ǒdalrico, fratri magnae Hildigardae, genitricis regum et imperatorum. |
| 4 | De quo, cum post obitum ipsius Hildigardae pro quodam commisso a Karolo viduaretur honoribus, quidam scurra in auribus misericordissimi Karoli proclamavit: 'Nunc habet Ǒdalricus honores perditos in oriente et occidente, defuncta sua sorore'. |
| 5 | Ad quae verba illacrimatus ille pristinos honores statim fecit illi restitui. |
| 6 | Ad sancta etiam loca dictante iusticia liberalissimas manus patenter aperuit, ut ex sequentibus apparebit. |