| 1 | Gloriosissimus itaque Karolus per totum regnum suum studia litterarum florere conspiciens, sed ad maturitatem patrum praecedentium non pervenire condolens et plus quam mortale laborans, in hanc tediatus vocem erupit: 'O utinam haberem XII clericos ita doctos, ut fuerunt Hieronimus et Augustinus!' Ad quod doctissimus Albinus, ex ipsorum comparatione merito se indoctissimum iudicans, in quantum nullus mortalium in conspectu terribilis Karoli andere praesumeret, maxima indignatione concepta sed parumper ostensa respondit: 'Creator caeli et terrae similes illis plures non habuit, et tu vis habere XII?' |