Notkerus Balbulus, De musica, DE MENSURA FISTULARUM ORGANICARUM., TEXTUS THEOTISCUS.
| 1 | Sidtu nu becennest. |
| 2 | uuio alle die suegela ein anderen encheden. |
| 3 | Sone bedrieze dih ouh iro maza zelir nenne. |
| 4 | Macha dia eristun so langa. |
| 5 | so dar fore gesaget ist. |
| 6 | ube du uuellest. |
| 7 | unde so uuita du uuellest. |
| 8 | tero uuiti sulen sie alle sin. |
| 9 | Unde miztia anderun bi dero eristum fus. |
| 10 | sih ze erist uuio uuit si si. |
| 11 | diu uuiti heizet diametrum. |
| 12 | Tara nah la an dero eristum suegelun lengi. |
| 13 | fore den ahtoden teil dero uuiti. |
| 14 | unde teile sia dannan nider unz ze dero zungun diu plectrum heizet. |
| 15 | in niun teil eben micheliu. |
| 16 | Dero niun teilo. |
| 17 | gib ahto teil dero anderun. |
| 18 | taz ist iro lengi. |
| 19 | fone dero zungun uf. |
| 20 | la dara nah fore an dero anderun suegelun lengi. |
| 21 | zuene ahtoteila des diametri. |
| 22 | unde teile daz ander aber also in niuniu. |
| 23 | unde gib tero niuno ahtoteil. |
| 24 | dero drittun. |
| 25 | daz ist iro lengi. |
| 26 | fone dero zungun uf. |
| 27 | Nim danne dia eristun. |
| 28 | unde la fore an iro lengi den dritten teil des diametri. |
| 29 | unde teile sia dannan niderunz ze dero zungun in fier teil. |
| 30 | unde dero gib triu dero fierdun. |
| 31 | taz ist iro lengi. |
| 32 | unde tara gat diatessaron. |
| 33 | mit tono tono semitonio. |
| 34 | Unde fernim io ze io gelichemo. |
| 35 | male. |
| 36 | fone dero zungun uf. |
| 37 | So nim aber dia eristun. |
| 38 | unde la. |
| 39 | an iro lengi fore den halben teil iro uuiti. |
| 40 | unde teila sia in driu teil. |
| 41 | unde gib tero zuei dero finftun. |
| 42 | Daz ist iro lengi. |
| 43 | Nim daranah selbun dia finftun. |
| 44 | unde la in iro lengi fore den ahtoden teil des diametri. |
| 45 | unde teile daz ander in fieriu. |
| 46 | unde gib tero driu dero sibendun. |
| 47 | Tanne miz tia ahtodun bi dero eristun. |
| 48 | la andero eristun fore. |
| 49 | so uilo des diametri si. |
| 50 | daz chit la fore alla dia uuiti. |
| 51 | unde teile daz ander in zuei eben micheliu teil. |
| 52 | unde gib einez tero ahtodun. |
| 53 | daz ist iro lengi fone demo plectro uf. |
| 54 | Unztara gat diapente. |
| 55 | mit tono tono semitonio tono. |
| 56 | Taranah kib tia selbun maza dien anderen sibenen. |
| 57 | tia du nah tero eristun dien ereren sibenin gabe. |
| 58 | So habet tanne diu erista zuo lengi dero ahtodun. |
| 59 | unde ein diametrum ubere. |
| 60 | Unde so samo habet tiu ahtoda zuo lengi dero finftozendun. |
| 61 | eunde ein diametrum ubere. |
| 62 | Aber diu erista habet fier lengi dero finftozendun. |
| 63 | Unde dara ubere triu diametra. |
| 64 | Ube dih uuunder ist. |
| 65 | zui iro driu sin. |
| 66 | nalszuei. |
| 67 | ih kibo dir is rationem. |
| 68 | Uuanda so man an dero eristun fore lazet ein diametrum. |
| 69 | unde si noh tanne dupla ist gagen dero ahtodun. |
| 70 | diu iro simpla ist. |
| 71 | unde aber dero lengi fore ferlazanemo diametro. |
| 72 | halbiu uuirt tero finftozendun. |
| 73 | so ist tero ahtodun note zuiualt. |
| 74 | tanne dero finftozendun. |
| 75 | unde ein diametrum. |
| 76 | unde dero eristun note fierualt. |
| 77 | unde zuei diametra. |
| 78 | ane daz erista diametrum. |
| 79 | Uuile aber der organicus fure finfzen. |
| 80 | alde sehszen seiten buohstaba. |
| 81 | folliu driu alphabeta machon. |
| 82 | so sol er daz dritta mezen nah tien ereren zuein. |
| 83 | also er daz ander maz nah temo eristen. |