Notkerus Balbulus, De musica, DE OCTO MODIS., TEXTUS THEOTISCUS.
| 1 | Ter ouh tia lirum uuerbe. |
| 2 | der uuerbe sia ze demo meze. |
| 3 | daz sie uber dene tiu ne kelle. |
| 4 | noh si fore flachize unlutreiste ne si. |
| 5 | diu hohesta uuarba. |
| 6 | unde diu niderosta. |
| 7 | die sint fore un meze ungeza mestun. |
| 8 | Bediu lobeton friges unde dores. |
| 9 | tia metens kaft. |
| 10 | tiu under dien zuein ist. |
| 11 | Unde also dores uuolton eteuuaz naheren sin dero niderostun. |
| 12 | danne dero oberostun. |
| 13 | so uuolton friges eteuuaz naheren sin dero oberastun danne dero niderostun. |
| 14 | die tuouuarba namot musica. |
| 15 | nah tien selben gentibus dorium modum unde frigium. |
| 16 | Under dien zuisken ist tonus. |
| 17 | taz ist iro zueio underskeit. |
| 18 | Obe frigio ist lidius. |
| 19 | tero underskeit ist tonus. |
| 20 | Obe lidio ist eines semitonii hohor mixolidius. |
| 21 | unde obe domo hohor eines toni ypermixolidius. |
| 22 | Noh tanne sint tri under dorio. |
| 23 | Nideror eines semitonii ist ypolidius. |
| 24 | under demo nideror eines toni ypofrigius. |
| 25 | unde aber eines toni nideror ypodorius. |
| 26 | taz ist ter niderosto fone demo ist hina uf ter ahtodo. |
| 27 | unde der oberosto ypermixolius. |
| 28 | An dien octo modis. |
| 29 | ih meino ypodorio. |
| 30 | ypofrigio. |
| 31 | ypolidio. |
| 32 | dorio. |
| 33 | frigio. |
| 34 | lidio. |
| 35 | mixolidio. |
| 36 | ypermixolidio. |
| 37 | sunt uns keougete octo species diapason simphoniae. |
| 38 | An dien uuir finden ufstigendo fone demo niderosten ze demo oberosten dise siben underskeita. |
| 39 | tonum. |
| 40 | tonum. |
| 41 | semitonium. |
| 42 | tonum. |
| 43 | tonum. |
| 44 | semitonium. |
| 45 | tonum. |
| 46 | Pediu liutet tiu oberosta uuarba duplum gagen dero niderostun. |
| 47 | Unde bediuternin. |
| 48 | ube daz ypodorius modus ist. |
| 49 | tanne uuir stillost anauahen zesingenne. |
| 50 | unde ube ypofrigius ist. |
| 51 | tanne uuir eines toni hohor anafahen. |
| 52 | unde ypofidius tanne zueio. |
| 53 | unde dorius tanne eines diatesseron. |
| 54 | unde frigius tanne eines diapente hohor. |
| 55 | unde ypermixolidius danne uuir folles diapason. |
| 56 | ih meino zuiualat hohor. |
| 57 | daz uuir danne hohor anafahen ne mugen. |
| 58 | uuanda ouh selbez taz sang. |
| 59 | note stigen sol fone dero stete dar iz anagefangen uuirt. |
| 60 | unz tara sin hobi gat. |
| 61 | ih meino uuilon ioh ze demo ahtoden buohstabe. |
| 62 | der zuiualt liutet. |
| 63 | tanne der buohstab. |
| 64 | ze demo iz anafieng. |
| 65 | Mennisken stimma nemag fure fierualt nicht kereichet uuerden. |
| 66 | Tiu fierualti ist so ze fermenne. |
| 67 | also ih nu chad. |
| 68 | taz fone demo eristen anafange in ypodorio. |
| 69 | so B. ist. |
| 70 | alde. |
| 71 | C. zuiualt ist hina uf hohi ze demo. |
| 72 | B. alde ze demo C. in ypermixolidio. |
| 73 | unde aber dannan zuiualt hina uf ze sine ahtoden buohstabe der imo zuiualt. |
| 74 | unde enemo fierualt liutet. |
| 75 | Tar maht tu chisen. |
| 76 | ube daz sang ferror stiget fone sinemo anafange. |
| 77 | danne ze demo ahtoden buohstabe. |
| 78 | so diu fore genamda antiphona tuot. |
| 79 | daz iz danne in permixolidio. |
| 80 | ana zefahenne ne ist. |
| 81 | uuanda an demo modo nioman uber den ahtoden buohstab kestigenne mag. Aber an so uuelichemo buohstabe imo hoho anauahentemo gebristet. |
| 82 | aba demo sturzeter note. |
| 83 | an daz nidera alphabetum. |
| 84 | ze demo selben buohstabe. |
| 85 | also er ouh sar dannan. |
| 86 | ube izimo penideret. |
| 87 | uuidere uf kestepfen mag an daz obera. |
| 88 | Anafahendo habet er geuualt ze erheuenne so nidero. |
| 89 | alde so hoho er uuile. |
| 90 | aber so er erheuet unde furder gerucchet. |
| 91 | sone habet singendone hein geuualt. |
| 92 | nideror alde hohor zefahenne. |
| 93 | ana aba duplo in simplum. |
| 94 | alde ab e simplo in duplum. |
| 95 | also erchunnen mag an demo monochordo. |
| 96 | alde an dero organun. |
| 97 | Ter die suegela meze der borgee desselben. |
| 98 | des andero lirun ze borgenne ist. |
| 99 | uuanda ube die eristun zelang uuerdent. |
| 100 | so sint sie selben unhelle. |
| 101 | unde habent heisa utun. |
| 102 | doh ouh tie andere sin lutreiste. |
| 103 | Uuerdent sie aber ze churz. |
| 104 | tannen sint die afterosten zechlei stimme. |
| 105 | doh tie eristen gnuog lutreiste sin. |
| 106 | sone diu cheden daz einero elno langue suegela. |
| 107 | fone dore zungun uf. |
| 108 | an demo eristen buohstabe ze churz si. |
| 109 | unde zueio langiu zelang si. |
| 110 | unde aber under dien zuisken gagen andero halbero langiu gelimflih si. |
| 111 | so habet tiu ahtoda ane halb diametrum. |
| 112 | einero elno dodrantem in lengi. |
| 113 | unde diu finftazenda mer danne trientem. |
| 114 | daz chit den drittenteil einero elno. |