| 1 | Si mihi Picena turdus palleret oliva, Tenderet aut nostras silva Sabina plagas, Aut crescente levis traheretur harundine praeda Pinguis et inplicitas virga teneret aves: Cara daret sollemne tibi cognatio munus, Nec frater nobis nec prior esset avus. |
| 2 | Nunc sturnos inopes fringuillarumque querellas Audit et arguto passere vernat ager; Inde salutatus picae respondet arator, Hinc prope summa rapax miluus astra volat. |
| 3 | Mittimus ergo tibi parvae munuscula chortis: Qualia si recipis, saepe propinquus eris. |