| 1 | Saecula Nestoreae permensa, Philaeni, senectae, Rapta es ad infernas tam cito Ditis aquas? Euboicae nondum numerabas longa Sibyllae Tempora: maior erat mensibus illa tribus. |
| 2 | Heu quae lingua silet! non illam mille catastae Vincebant, nec quae turba Sarapin amat, Nec matutini cirrata caterva magistri, Nec quae Strymonio de grege ripa sonat. |
| 3 | Quae nunc Thessalico lunam deducere rhombo, Quae sciet hos illos vendere lena toros? Sit tibi terra levis mollique tegaris harena, Ne tua non possint eruere ossa canes. |