| 1 | Nomen cum violis rosisque natum, Quo pars optima nominatur anni, Hyblam quod sapit Atticosque flores, Quod nidos olet alitis superbae; Nomen nectare dulcius beato, Quo mallet Cybeles puer vocari Et qui pocula temperat Tonanti, Quod si Parrhasia sones in aula, Respondent Veneres Cupidinesque; Nomen nobile, molle, delicatum Versu dicere non rudi volebam: Sed tu syllaba contumax rebellas. |
| 2 | Dicunt Eiarinon tamen poetae, Sed Graeci, quibus est nihil negatum Et quos Ἆρες Ἄρες decet sonare: Nobis non licet esse tam disertis, Qui Musas colimus severiores. |