| 1 | Saturnalia divitem Sabellum Fecerunt: merito tumet Sabellus, Nec quemquam putat esse praedicatque Inter causidicos beatiorem. |
| 2 | Hos fastus animosque dat Sabello Farris semodius fabaeque fresae, Et turis piperisque tres selibrae, Et Lucanica ventre cum Falisco, Et nigri Syra defruti lagona, Et ficus Libyca gelata testa Cum bulbis cocleisque caseoque. |
| 3 | Piceno quoque venit a cliente Parcae cistula non capax olivae, Et crasso figuli polita caelo Septenaria synthesis Sagunti, Hispanae luteum rotae toreuma, Et lato variata mappa clavo. |
| 4 | Saturnalia fructuosiora Annis non habuit decem Sabellus. |