| 1 | Obstat, care Pudens, nostris sua turba libellis Lectoremque frequens lassat et implet opus. |
| 2 | Rara iuvant: primis sic maior gratia pomis, Hibernae pretium sic meruere rosae; Sic spoliatricem commendat fastus amicam, Ianua nec iuvenem semper aperta tenet. |
| 3 | Saepius in libro numeratur Persius uno, Quam levis in tota Marsus Amazonide. |
| 4 | Tu quoque de nostris releges quemcumque libellis, Esse puta solum: sic tibi pluris erit. |