| 1 | Argiletanas mavis habitare tabernas, Cum tibi, parve liber, scrinia nostra vacent. |
| 2 | Nescis, heu, nescis dominae fastidia Romae: Crede mihi, nimium Martia turba sapit. |
| 3 | Maiores nusquam rhonchi: iuvenesque senesque Et pueri nasum rhinocerotis habent. |
| 4 | Audieris cum grande sophos, dum basia iactas, Ibis ab excusso missus in astra sago. |
| 5 | Sed tu ne totiens domini patiare lituras Neve notet lusus tristis harundo tuos, Aetherias, lascive, cupis volitare per auras: I, fuge; sed poteras tutior esse domi. |