Martialis, 12, LII.
| 1 | Tempora Pieria solitus redimire corona, |
| 2 | Nec minus attonitis vox celebrata reis, |
| 3 | Hic situs est, hic ille tuus, Sempronia, Rufus, |
| 4 | Cuius et ipse tui flagrat amore cinis. |
| 5 | Dulcis in Elysio narraris fabula campo, |
| 6 | Et stupet ad raptus Tyndaris ipsa tuos: |
| 7 | Tu melior, quae deserto raptore redisti, |
| 8 | Illa virum voluit nec repetita sequi. |
| 9 | Ridet et Iliacos audit Menelaus amores: |
| 10 | Absolvit Phrygium vestra rapina Parim. |
| 11 | Accipient olim cum te loca laeta piorum, |
| 12 | Non erit in Stygia notior umbra domo: |
| 13 | Non aliena videt, sed amat Proserpina raptas: |
| 14 | Iste tibi dominam conciliabit amor. |