| 1 | Municipem rigidi quis te, Marcella, Salonis |
| 2 | Et genitam nostris quis putet esse locis? |
| 3 | Tam rarum, tam dulce sapis. Palatia dicent, |
| 4 | Audierint si te vel semel, esse suam; |
| 5 | Nulla nec in media certabit nata Subura |
| 6 | Nec Capitolini collis alumna tibi; |
| 7 | Nec cito ridebit peregrini gloria partus, |
| 8 | Romanam deceat quam magis esse nurum. |
| 9 | Tu desiderium dominae mihi mitius urbis |
| 10 | Esse iubes: Romam tu mihi sola facis. |