| 1 | Quare tam multis a te, Laetine, diebus |
| 2 | Non abeat febris, quaeris et usque gemis. |
| 3 | Gestatur tecum pariter pariterque lavatur; |
| 4 | Cenat boletos, ostrea, sumen, aprum; |
| 5 | Ebria Setino fit saepe et saepe Falerno, |
| 6 | Nec nisi per niveam Caecuba potat aquam; |
| 7 | Circumfusa rosis et nigra recumbit amomo, |
| 8 | Dormit et in pluma purpureoque toro. |
| 9 | Cum recubet pulchre, cum tam bene vivat apud te, |
| 10 | Ad Damam potius vis tua febris eat? |