Martialis, 11, XLIX.
| 1 | Nulla est hora tibi qua non me, Phylli, furentem |
| 2 | Despolies: tanta calliditate rapis. |
| 3 | Nunc plorat speculo fallax ancilla relicto, |
| 4 | Gemma vel a digito vel cadit aure lapis; |
| 5 | Nunc furtiva lucri fieri bombycina possunt, |
| 6 | Profertur Cosmi nunc mihi siccus onyx; |
| 7 | Amphora nunc petitur nigri cariosa Falerni, |
| 8 | Expiet ut somnos garrula saga tuos; |
| 9 | Nunc ut emam grandemve lupum mullumve bilibrem, |
| 10 | Indixit cenam dives amica tibi. |
| 11 | Sit pudor et tandem veri respectus et aequi: |
| 12 | Nil tibi, Phylli, nego; nil mihi, Phylli, nega. |