Martialis, 11, XXVII.
| 1 | Ferreus es, si stare potest tibi mentula, Flacce, |
| 2 | Cum te sex cyathos orat amica gari, |
| 3 | Vel duo frusta rogat cybii tenuemve lacertum, |
| 4 | Nec dignam toto se botryone putat; |
| 5 | Cui portat gaudens ancilla paropside rubra |
| 6 | Hallecem, sed quam protinus illa voret; |
| 7 | Aut cum perfricuit frontem posuitque pudorem, |
| 8 | Sucida palliolo vellera quinque petit. |
| 9 | At mea me libram foliati poscat amica, |
| 10 | Aut virides gemmas sardonychasve pares, |
| 11 | Nec nisi prima velit de Tusco Serica vico, |
| 12 | Aut centum aureolos sic velut aera roget. |
| 13 | Nunc tu velle putas haec me donare puellae? |
| 14 | Nolo, sed his ut sit digna puella volo. |