Martialis, 10, LI.
| 1 | Sidera iam Tyrius Phrixei respicit agni |
| 2 | Taurus, et alternum Castora fugit hiems; |
| 3 | Ridet ager, vestitur humus, vestitur et arbor, |
| 4 | Ismarium paelex Attica plorat Ityn. |
| 5 | Quos, Faustine, dies, qualem tibi Roma Ravennam |
| 6 | Abstulit! o soles, o tunicata quies! |
| 7 | O nemus, o fontes solidumque madentis harenae |
| 8 | Litus et aequoreis splendidus Anxur aquis, |
| 9 | Et non unius spectator lectulus undae, |
| 10 | Qui videt hinc puppes fluminis, inde maris! |
| 11 | Sed nec Marcelli Pompeianumque, nec illic |
| 12 | Sunt triplices thermae, nec fora iuncta quater, |
| 13 | Nec Capitolini summum penetrale Tonantis, |
| 14 | Quaeque nitent caelo proxima templa suo. |
| 15 | Dicere te lassum quotiens ego credo Quirino: |
| 16 | 'Quae tua sunt, tibi habe: quae mea, redde mihi.' |