| 1 | Simplicior priscis, Munati Galle, Sabinis, |
| 2 | Cecropium superas qui bonitate senem, |
| 3 | Sic tibi consoceri claros retinere penates |
| 4 | Perpetua natae det face casta Venus: |
| 5 | Ut tu, si viridi tinctos aerugine versus |
| 6 | Forte malus livor dixerit esse meos, |
| 7 | Ut facis, a nobis abigas, nec scribere quemquam |
| 8 | Talia contendas carmina, qui legitur. |
| 9 | Hunc servare modum nostri novere libelli, |
| 10 | Parcere personis, dicere de vitiis. |