Martialis, 10, IV.
| 1 | Qui legis Oedipoden caligantemque Thyesten, |
| 2 | Colchidas et Scyllas, quid nisi monstra legis? |
| 3 | Quid tibi raptus Hylas, quid Parthenopaeus et Attis, |
| 4 | Quid tibi dormitor proderit Endymion? |
| 5 | Exutusve puer pinnis labentibus? aut qui |
| 6 | Odit amatrices Hermaphroditus aquas? |
| 7 | Quid te vana iuvant miserae ludibria chartae? |
| 8 | Hoc lege, quod possit dicere vita 'Meum est.' |
| 9 | Non hic Centauros, non Gorgonas Harpyiasque |
| 10 | Invenies: hominem pagina nostra sapit. |
| 11 | Sed non vis, Mamurra, tuos cognoscere mores |
| 12 | Nec te scire: legas Aetia Callimachi. |