Martialis, 9, CI.
| 1 | Appia, quam simili venerandus in Hercule Caesar |
| 2 | Consecrat, Ausoniae maxima fama viae, |
| 3 | Si cupis Alcidae cognoscere facta prioris, |
| 4 | Disce: Libyn domuit, aurea poma tulit, |
| 5 | Peltatam Scythico discinxit Amazona nodo, |
| 6 | Addidit Arcadio terga leonis apro, |
| 7 | Aeripedem silvis cervum, Stymphalidas astris |
| 8 | Abstulit, a Stygia cum cane venit aqua, |
| 9 | Fecundam vetuit reparari mortibus hydram, |
| 10 | Hesperias Tusco lavit in amne boves. |
| 11 | Haec minor Alcides: maior quae gesserit, audi, |
| 12 | Sextus ab Albana quem colit arce lapis. |
| 13 | Adseruit possessa malis Palatia regnis, |
| 14 | Prima suo gessit pro Iove bella puer; |
| 15 | Solus Iuleas cum iam retineret habenas, |
| 16 | Tradidit inque suo tertius orbe fuit; |
| 17 | Cornua Sarmatici ter perfida contudit Histri, |
| 18 | Sudantem Getica ter nive lavit equum; |
| 19 | Saepe recusatos parcus duxisse triumphos |
| 20 | Victor Hyperboreo nomen ab orbe tulit; |
| 21 | Templa deis, mores populis dedit, otia ferro, |
| 22 | Astra suis, caelo sidera, serta Iovi. |
| 23 | Herculeum tantis numen non sufficit actis: |
| 24 | Tarpeio deus hic commodet ora patri. |