Martialis, 9, XCVII.
| 1 | Rumpitur invidia quidam, carissime Iuli, |
| 2 | Quod me Roma legit, rumpitur invidia. |
| 3 | Rumpitur invidia, quod turba semper in omni |
| 4 | Monstramur digito, rumpitur invidia. |
| 5 | Rumpitur invidia, tribuit quod Caesar uterque |
| 6 | Ius mihi natorum, rumpitur invidia. |
| 7 | Rumpitur invidia, quod rus mihi dulce sub urbe est |
| 8 | Parvaque in urbe domus, rumpitur invidia. |
| 9 | Rumpitur invidia, quod sum iucundus amicis, |
| 10 | Quod conviva frequens, rumpitur invidia. |
| 11 | Rumpitur invidia, quod amamur quodque probamur: |
| 12 | Rumpatur, quisquis rumpitur invidia. |