| 1 | Festinata sui gemeret quod fata Severi |
| 2 | Silius, Ausonio non semel ore potens, |
| 3 | Cum grege Pierio maestus Phoeboque querebar. |
| 4 | 'Ipse meum flevi' dixit Apollo 'Linon:' |
| 5 | Respexitque suam quae stabat proxima fratri |
| 6 | Calliopen et ait: 'Tu quoque vulnus habes. |
| 7 | Aspice Tarpeium Palatinumque Tonantem: |
| 8 | Ausa nefas Lachesis laesit utrumque Iovem. |
| 9 | Numina cum videas duris obnoxia fatis, |
| 10 | Invidia possis exonerare deos.' |