| 1 | Cum tua sacrilegos contra, Norbane, furores |
| 2 | Staret pro domino Caesare sancta fides, |
| 3 | Haec ego Pieria ludebam tutus in umbra, |
| 4 | Ille tuae cultor notus amicitiae. |
| 5 | Me tibi Vindelicis Raetus narrabat in oris, |
| 6 | Nescia nec nostri nominis Arctos erat: |
| 7 | O quotiens veterem non infitiatus amicum |
| 8 | Dixisti 'Meus est iste poeta, meus!' |
| 9 | Omne tibi nostrum quod bis trieteride iuncta |
| 10 | Ante dabat lector, nunc dabit auctor opus. |