| 1 | Dixerat 'o mores! o tempora!' Tullius olim, |
| 2 | Sacrilegum strueret cum Catilina nefas, |
| 3 | Cum gener atque socer diris concurreret armis |
| 4 | Maestaque civili caede maderet humus. |
| 5 | Cur nunc 'o mores!', cur nunc 'o tempora!' dicis? |
| 6 | Quod tibi non placeat, Caeciliane, quid est? |
| 7 | Nulla ducum feritas, nulla est insania ferri; |
| 8 | Pace frui certa laetitiaque licet. |
| 9 | Non nostri faciunt, tibi quod tua tempora sordent, |
| 10 | Sed faciunt mores, Caeciliane, tui. |