| 1 | Nil est tritius Hedyli lacernis: |
| 2 | Non ansae veterum Corinthiorum, |
| 3 | Nec crus compede lubricum decenni, |
| 4 | Nec ruptae recutita colla mulae, |
| 5 | Nec quae Flaminiam secant salebrae, |
| 6 | Nec qui litoribus nitent lapilli, |
| 7 | Nec Tusca ligo vinea politus, |
| 8 | Nec pallens toga mortui tribulis, |
| 9 | Nec pigri rota quassa mulionis, |
| 10 | Nec rasum cavea latus visontis, |
| 11 | Nec dens iam senior ferocis apri. |
| 12 | Res una est tamen: ipse non negabit, |
| 13 | Culus tritior Hedyli lacernis. |