| 1 | Cum sis ipsa domi mediaque ornere Subura, |
| 2 | Fiant absentes et tibi, Galla, comae, |
| 3 | Nec dentes aliter quam Serica nocte reponas, |
| 4 | Et iaceas centum condita pyxidibus, |
| 5 | Nec tecum facies tua dormiat, innuis illo, |
| 6 | Quod tibi prolatum est mane, supercilio, |
| 7 | Et te nulla movet cani reverentia cunni, |
| 8 | Quem potes inter avos iam numerare tuos. |
| 9 | Promittis sescenta tamen; sed mentula surda est, |
| 10 | Et sit lusca licet, te tamen illa videt. |