Martialis, 9, XXXV.
| 1 | Artibus his semper cenam, Philomuse, mereris, |
| 2 | Plurima dum fingis, sed quasi vera refers. |
| 3 | Scis, quid in Arsacia Pacorus deliberet aula, |
| 4 | Rhenanam numeras Sarmaticamque manum, |
| 5 | Verba ducis Daci chartis mandata resignas, |
| 6 | Victricem laurum quam venit ante vides, |
| 7 | Scis, quotiens Phario madeat Iove fusca Syene, |
| 8 | Scis, quota de Libyco litore puppis eat, |
| 9 | Cuius Iuleae capiti nascantur olivae, |
| 10 | Destinet aetherius cui sua serta pater. |
| 11 | Tolle tuas artes; hodie cenabis apud me |
| 12 | Hac lege, ut narres nil, Philomuse, novi. |