| 1 | Cum comes Arctois haereret Caesaris armis |
| 2 | Velius, hanc Marti pro duce vovit avem; |
| 3 | Luna quater binos non tota peregerat orbes, |
| 4 | Debita poscebat iam sibi vota deus: |
| 5 | Ipse suas anser properavit laetus ad aras |
| 6 | Et cecidit sanctis hostia parva focis. |
| 7 | Octo vides patulo pendere nomismata rostro |
| 8 | Alitis? haec extis condita nuper erant: |
| 9 | Quae litat argento pro te, non sanguine, Caesar, |
| 10 | Victima, iam ferro non opus esse docet. |