Martialis, 9, XXIX.
| 1 | Saecula Nestoreae permensa, Philaeni, senectae, |
| 2 | Rapta es ad infernas tam cito Ditis aquas? |
| 3 | Euboicae nondum numerabas longa Sibyllae |
| 4 | Tempora: maior erat mensibus illa tribus. |
| 5 | Heu quae lingua silet! non illam mille catastae |
| 6 | Vincebant, nec quae turba Sarapin amat, |
| 7 | Nec matutini cirrata caterva magistri, |
| 8 | Nec quae Strymonio de grege ripa sonat. |
| 9 | Quae nunc Thessalico lunam deducere rhombo, |
| 10 | Quae sciet hos illos vendere lena toros? |
| 11 | Sit tibi terra levis mollique tegaris harena, |
| 12 | Ne tua non possint eruere ossa canes. |